JP Magazine v2 - шаблон joomla Оригами

ພະແນກ ປທສ ແຂວງບໍລິຄຳໄຊ ຈັດຕັ້ງເຊື່ອມຊືມເອກະສານທີ່ສຳຄັນ

ຂຽນໂດຍ khen. Posted in ກ່ຽວກັບພະແນກ

ໃນຕອນເຊົ້າວັນທີ 4 ກັນຍາ 2018 ທີ່ຜ່ານມານີ້, ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊ ໄດ້ເຜີຍແຜ່ເຊື່ອມຊືມເອກະສານທີ່ສຳຄັນ ຈຳນວນ 3 ເອກະສານຄື: 1) ມະຕິຂອງຄະນະບໍລິຫານງານສູນກາງພັກປະຊາຊົນປະຕິວັດລາວ ສະບັບເລກທີ 037/ຄບສພ, ລົງວັນທີ 18 ມີຖຸນາ 2018 ວ່າດ້ວຍການຍົກສູງປະສິດທິພາບຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ; 2) ຂໍ້ຕົກລົງຂອງທ່ານເຈົ້າແຂວງ ສະບັບເລກທີ 463/ຂບຊ, ລົງວັນທີ 28 ມີຖຸນາ 2018 ວ່າດ້ວຍການປະສານງານລະຫວ່າງເມືອງ, ພະແນກການ, ຫ້ອງການ, ກົມກອງກັບຫ້ອງວ່າການປົກຄອງແຂວງ; 3) ແຈ້ງການແນະນໍາຂອງຄະນະຈັດຕັ້ງແຂວງ ສະບັບເລກທີ 0612/ຄຈ.ຂບຊ, ລົງວັນທີ 29 ສິງຫາ 2018 ກ່ຽວກັບການກະກຽມພະນັກງານສືບທອດປ່ຽນແທນຕຳແໜ່ງນຳພາຄຸ້ມຄອງແຕ່ລະຂັ້ນໃນຂົງເຂດຕົນ. ໃຫ້ກຽດເຜີຍແຜ່ເອກະສານໃນຄັ້ງນີ້ມີທ່ານ ລັງສີ ແກ້ວວິເສດ ເລຂາຄະນະພັກຮາກຖານ ຫົວໜ້າພະແນກ ປທສ ແຂວງ, ທ່ານ ວັດທະນາ ໄຊຍະແສງ ເລຂາໜ່ວຍພັກພະແນກ ປທສ ແຂວງ ແລະ ທ່ານ ວັດທະນາ ສີສຸວັນທອງ ຮອງຫົວໜ້າພະແນກ ປທສ ແຂວງ, ມີບັນດາພະນັກງານ-ລັດຖະກອນ ພາຍໃນພະແນກເຂົ້າຮ່ວມຮັບຟັງຢ່າງພ້ອມພຽງ.

ໃນກອງປະຊຸມທ່ານ ລັງສີ ແກ້ວວິເສດ ເລຂາຄະນະພັກຮາກຖານ ຫົວໜ້າພະແນກ ປທສ ແຂວງ ໄດ້ກ່າວຈຸດປະສົງ ແລະ ໄດ້ເຜີຍແຜ່ມະຕິຂອງຄະນະບໍລິຫານງານສູນກາງພັກປະຊາຊົນປະຕິວັດລາວ ສະບັບເລກທີ 037/ຄບສພ, ລົງວັນທີ 18 ມີຖຸນາ 2018 ວ່າດ້ວຍການຍົກສູງປະສິດທິພາບຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ, ທ່ານຍັງໄດ້ຍົກໃຫ້ເຫັນຫຼາຍບັນຫາທີ່ສຳຄັນ ໂດຍສະເພາະແມ່ນທັດສະນະ ແລະ ທິດທາງລວມຂອງພັກ, ເພື່ອຍົກສູງປະສິດທິພາບໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ.

ຫຼັງຈາກນັ້ນທ່ານ ວັດທະນາ ສີສຸວັນທອງ ຮອງຫົວໜ້າພະແນກ ປທສ ແຂວງ ກໍ່ໄດ້ເຜີຍແຜ່ຂໍ້ຕົກລົງຂອງທ່ານເຈົ້າແຂວງ ສະບັບເລກທີ 463/ຂບຊ, ລົງວັນທີ 28 ມີຖຸນາ 2018 ວ່າດ້ວຍການປະສານງານລະຫວ່າງເມືອງ, ພະແນກການ, ຫ້ອງການ, ກົມກອງກັບຫ້ອງວ່າການປົກຄອງແຂວງ, ຈຸດປະສົງກໍ່ເພື່ອຜັນຂະຫຍາຍເນື້ອໃນ ຂອງກົດໝາຍໃຫ້ມັນລະອຽດຮັດກຸມຕື່ມ, ຊຶ່ງໄດ້ກຳນົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງເຄື່ອນໄຫວ, ການຄຸ້ມຄອງ ແລະ ຕິດຕາມກວດກາ ການພັດທະນາວຽກງານຂອງຕົນ ໃຫ້ມີຄວາມສະດວກໃນການຈັດຕັ້ງປະຕິບັດຕົວຈິງ. ຈາກນັ້ນທ່ານ ວັດທະນາ ໄຊຍະແສງ ເລຂາໜ່ວຍພັກ ຮອງຫົວໜ້າພະແນກ ປທສ ແຂວງ ກໍ່ໄດ້ເຜີຍແຜ່ແຈ້ງການແນະນໍາຂອງຄະນະຈັດຕັ້ງແຂວງ ສະບັບເລກທີ 0612/ຄຈ.ຂບຊ, ລົງວັນທີ 29 ສິງຫາ 2018 ກ່ຽວກັບການກະກຽມພະນັກງານສືບທອດປ່ຽນແທນຕຳແໜ່ງນຳພາຄຸ້ມຄອງແຕ່ລະຂັ້ນໃນຂົງເຂດຕົນ, ແຈ້ງການສະບັບນີ້ເພື່ອຄາດຄະເນເປົ້າໝາຍພະນັກງານທີ່ຈະສັບຊ້ອນ, ຈັດວາງເຂົ້າໃນຕຳແໜ່ງນຳພາ-ຄຸ້ມຄອງແຕ່ລະຂັ້ນ, ຍົກສູງຄຸນນະພາບວຽກງານພະນັກງານ ແລະ ຖັນແຖວພະນັກງານນຳພາຄຸ້ມຄອງປະກອບສ່ວນສຳຄັນເຂົ້າໃນການປັບປຸງການເຄື່ອນໄຫວຂອງກົງຈັກການຈັດຕັ້ງແຕ່ລະຂັ້ນໃຫ້ມີປະສິດທິພາບ.

 ກອງປະຊຸມຍັງໄດ້ປະກາດສັບຊ້ອນໜ້າທີ່ວຽກງານໃຫ້ແກ່ພະນັກງານພາຍໃນພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊຄືນໃໝ່ ເຊິ່ງອີງຕາມການຄົ້ນຄວ້າ ແລະ ເຫັນດີເປັນເອກະພາບຂອງຄະນະພະແນກ ປທສ ແຂວງບໍລິຄຳໄຊ ໃຫ້ແຕ່ງຕັ້ງ, ສັບຊ້ອນ, ຈັດວາງພະນັກງານນຳພາ-ຄຸ້ມຄອງ ທີ່ກ່ຽວຂ້ອງກັບວຽກງານຕົວຈິງ ຈຳນວນ 3 ສະຫາຍ, ຍິງ 2 ສະຫາຍ.