JP Magazine v2 - шаблон joomla Оригами

ພະແນກ ປທສ ແຂວງບໍລິຄຳໄຊ ປະກາດແຕ່ງຕັ້ງຫົວໜ້າ ແລະ ຮອງຫົວໜ້າຂະແໜງ

ຂຽນໂດຍ khen. Posted in ກ່ຽວກັບພະແນກ

ໃນຕອນບ່າຍວັນທີ 8 ມັງກອນ 2018 ຜ່ານມານີ້; ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊ ໄດ້ຈັດພິທີປະກາດແຕ່ງຕັ້ງຫົວໜ້າ ແລະ ຮອງຫົວໜ້າຂະແໜງ ພາຍໃນພະແນກ ປທສ ແຂວງບໍລິຄຳໄຊ, ພາຍໃຕ້ການເປັນປະທານຂອງທ່ານ ລັງສີ ແກ້ວວິເສດ ຫົວໜ້າພະແນກ ປທສ ແຂວງບໍລິຄຳໄຊ, ມີຄະນະອຳນວຍການບັນດາບໍລິສັດ ຜູ້ໃຫ້ບໍລິການດ້ານໄປສະນີ, ໂທລະຄົມ ສາຂາແຂວງບໍລິຄຳໄຊ ແລະ ມີພະນັກງານ-ລັດຖະກອນ ພາຍໃນພະແນກເຂົ້າຮ່ວມຢ່າງພ້ອມພຽງ.

ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງບໍລິຄຳໄຊ ສະບັບເລກທີ 012/ຂບຊ, ລົງວັນທີ 2 ມັງກອນ 2018 ວ່າດ້ວຍການແຕ່ງຕັ້ງຫົວໜ້າ ແລະ ຮອງຫົວໜ້າຂະແໜງ ພາຍໃນພະແນກ ປທສ ແຂວງບໍລິຄຳໄຊ, ຈໍານວນ 6 ທ່ານ, ຍິງ 3 ທ່ານຄື: 1) ທ່ານ ນາງ ແສງອາລຸນ ໄຊມູນວົງ ເປັນຫົວໜ້າຂະແໜງແຜນການ-ການເງິນ, 2) ທ່ານ ພອນສັກ ພົມພິມພາ ເປັນຫົວໜ້າຂະແໜງດັດສົມໂທລະຄົມ, 3) ທ່ານ ນາງ ພິມພອນ ໄຊຍະລາດ ເປັນຮອງຫົວໜ້າຂະແໜງບໍລິຫານ, ຈັດຕັ້ງ ແລະ ກວດກາ, 4) ທ່ານ ນາງ ສິລິວັນ ຈະເລີນສຸກ ເປັນຮອງຫົວໜ້າຂະແໜງແຜນການ-ການເງິນ, 5) ທ່ານ ກອນ ໄຊຍະສານ ເປັນຮອງຫົວໜ້າຂະແໜງໄປສະນີ, 6) ທ່ານ ສອນໄຊ ສິດທິວົງທອງ ເປັນຮອງຫົວໜ້າຂະແໜງເຕັກໂນໂລຊີ ການສື່ສານຂໍ້ມູນຂ່າວສານ. ໃນພິທີທ່ານ ລັງສີ ແກ້ວວິເສດ ຫົວໜ້າພະແນກ ປທສ ແຂວງບໍລິຄຳໄຊ ໄດ້ໃຫ້ກຽດໂອ້ລົມ ຕໍ່ພະນັກງານທີ່ໄດ້ຮັບການຊັບຊ້ອນ ແລະ ພາລະບົດບາດ, ສິດ ແລະ ໜ້າທີ່ຮັບຜິດຊອບໃໝ່ ໂດຍທ່ານໄດ້ເນັ້ນໃຫ້ພະນັກງານສະມາຊິກພັກ ທີ່ເປັນພະນັກງານຫຼັກແຫຼ່ງຕົ້ນຕໍ ຈົ່ງເພີມຄວາມເອົາໃຈໃສ່ ແລະ ຕ້ອງມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ໄດ້ຮັບມອບໝາຍ ເພື່ອເຮັດໃຫ້ການຈັດຕັ້ງປະຕິບັດໜ້າທີ່ວຽກງານທ່ວງທັນກັບສະພາບທາງດ້ານການເມືອງ ແລະ ວິຊາສະເພາະໃນໄລຍະໃໝ່, ພ້ອມກັນບຸກບຶນ ສຸມສະຕິປັນຍາເຂົ້າໃນການຊີ້ນຳ-ນຳພາ ຈັດຕັ້ງປະຕິບັດໜ້າທີ່ວຽກງານໃຫ້ໄດ້ຮັບຜົນສຳເລັດເປັນຢ່າງດີ.