JP Magazine v2 - шаблон joomla Оригами

ກໍາມະບານຮາກຖານພະແນກ ປທສ ແຂວງບໍລິຄຳໄຊ ປະເມີນຜົນຂະບວນການ 5 ເປັນເຈົ້າ ປະຈຳປີ 2017

ຂຽນໂດຍ khen. Posted in ກ່ຽວກັບພະແນກ

ບັ້ນດຳເນີນການກວດກາ ປະເມີນຜົນຂະບວນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຂອງກຳມະບານຮາກຖານພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊ ໄດ້ຈັດຂື້ນໃນລະຫວ່າງ ວັນທີ 18-19 ຕຸລາ 2017 ຜ່ານມານີ້, ທີ່ພະແນກ ໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊ, ພາຍໃຕ້ການເປັນປະທານຂອງທ່ານ ວັດທະນາ ສີສຸວັນທອງ ຄະນະບໍລິຫານງານສະຫະພັນກຳມະບານແຂວງ ປະທານສະຫະພັນກຳມະບານພະແນກ ປທສ ແຂວງ, ພ້ອມດ້ວຍສະມາຊິກກຳມະບານພາຍໃນຮາກຖານຂອງຕົນເຂົ້າຮ່ວມຢ່າງພ້ອມພຽງ.

ໃນວາລະການດຳເນີນ ປະເມີນຜົນຂະບວນການ 5 ເປັນເຈົ້າຄັ້ງນີ້, ທ່ານ ວັດທະນາ ສີສຸວັນທອງ ປະທານສະຫະພັນກຳມະບານ ພະແນກ ປທສ ແຂວງບໍລິຄຳໄຊ ໄດ້ເຜີຍແຜ່ເນື້ອໃນຂໍ້ແຂ່ງຂັນ 5 ເປັນເຈົ້າຄື: ເປັນເຈົ້າໂຄສະນາສຶກສາອົບຮົມການເມືອງ-ແນວຄິດ, ເປັນເຈົ້າໃນການປັງປຸງແບບແຜນການນຳພາ ແລະ ຂະຫາຍການຈັດຕັ້ງກຳມະບານ, ເປັນເຈົ້າການປົກປ້ອງສິດ ແລະ ຜົນປະໂຫຍດອັນຊອບທຳ ຂອງພະນັກງານສະມາຊິກກຳມະບານ, ກຳມະກອນ ແລະ ຜູ້ອອກແຮງງານ, ເປັນເຈົ້າເຂົ້າຮ່ວມໃນການຕິດຕາມ, ກວດກາການຄຸ້ມຄອງລັດ, ຄຸ້ມຄອງເສດຖະກິດ, ວັດທະນະທຳ-ສັງຄົມ, ເປັນເຈົ້າເຂົ້າຮ່ວມການຈັດຕັ້ງປະຕິບັດແນວທາງການຕ່າງປະເທດຂອງພັກ, ລະບຽບກົດໝາຍຂອງລັດ. ຜ່ານການຄົ້ນຄວ້າເຊື່ອມຊຶມເອກະສານເຫຼົ່ານີ້ແລ້ວ, ຍັງໄດ້ດຳເນີນຜ່ານໃບປະເມີນຜົນ ເພື່ອຕີລາຄາທາງ​ດ້ານ​ດີ, ດ້ານ​ອ່ອນ ​ແລະ ອອກ​ຄຳ​ຄິດ​ຄຳ​ເຫັນຕຳ​ນິສົ່ງ​ຂ່າວ ​ເພື່ອ​ກໍ່ສ້າງ ​ແລະ ຊ່ວຍ​ເຫຼືອ​ເຊິ່ງກັນ ​ແລະ ກັນ, ຕີ​ລາຄາ​ຈັດ​ແບ່ງ​ປະ​ເພດໃຫ້ແຕ່ລະສະຫາຍ. ຈາກນັ້ນທ່ານ ວັດທະນາ ໄຊຍະແສງ ຮອງປະທານກຳມະບານຮາກຖານພະແນກ ປທສ ແຂວງ, ກໍໄດ້ຜ່ານບົດສະຫຼຸບລາຍງານຜົນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈຳປີ 2017 ແລະ ວາງທິດທາງແຜນການ 2018: ໃນໜຶ່ງປີຜ່ານມາສະມາຊິກກຳມະບານແຕ່ລະສະຫາຍ ຍັງສາມາດຮັກສາທັດສະນະຫຼັກໝັ້ນໃນອຸດົມການຂອງພັກ, ມີຄວາມຈົງຮັກພັກດີຕໍ່ພັກ, ຕໍ່ອຸດົມການສັງຄົມນິຍົມ, ຊື່ສັດບໍລິສຸດຕໍ່ພັກ-ຕໍ່ລັດ, ຕໍ່ປະເທດຊາດ ແລະ ປະຊາຊົນກໍ່ຄືຊາວຜູ້ອອກແຮງງານລາວບັນດາເຜົ່າ, ພ້ອມນັ້ນຍັງໄດ້ປະຕິບັດພາລະບົດບາດ, ໜ້າທີ່ ແລະ ສິດຂອງຕົນ ແລະ ອອກແຮງແຂ່ງຂັນປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ທີ່ທາງສູນກາງກຳມະບານລາວວາງອອກ. ກຳມະບານຮາກຖານພະແນກ ປທສ ແຂວງ ມີສະມາຊິກກຳມະບານທັງໝົດ 20 ສະຫາຍ, ຍິງ 9 ສະຫາຍ, ກວມເອົາ 91% ຂອງຈຳນວນພະນັກງານທັງໝົດ, ເຊິ່ງໄດ້ກາຍເປັນເງື່ອນໄຂ ແລະ ກຳລັງແຮງໃຫ້ແກ່ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ.

ໃນໂອກາດສະຫຼຸບບັ້ນປະເມີນຜົນ 5 ເປັນເຈົ້າຄັ້ງນີ້ ທ່ານ ລັງສີ ແກ້ວວິເສດ ເລຂາຄະນະພັກຮາກຖານ ຫົວໜ້າພະແນກ ປທສ ແຂວງ ກໍ່ໄດ້ໃຫ້ກຽດໂອ້ລົມສະມາຊິກກຳມະບານ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໝາກຜົນໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ໃນໄລຍະ 1 ປີ ຜ່ານມາ. ພ້ອມເນັ້ນໃຫ້ສືບຕໍຊີ້ນຳ-ນຳພາສຶກສາອົບຮົມການເມືອງ-ແນວຄິດ ຂອງພະນັກງານ, ສະມາຊິກກຳມະບານ ໂດຍສະເພາະແມ່ນ ການນຳເອົາລະບຽບ, ກົດໝາຍ, ນິຕິກຳຕ່າງໆ ມາຈັດຕັ້ງເຊື່ອມຊຶມໃຫ້ເປັນປົກກະຕິ ແລະ ຕໍ່ເນື່ອງ, ເພີ່ມທະວີຄວາມສາມັກຄີເປັນເອກະພາບພາຍໃນໃຫ້ແໜ້ນແຟ້ນ, ຢຶດໝັ້ນຫຼັກການລວມສູນປະຊາທິປະໄຕ, ບຸກຄົນຮັບຜິດຊອບ, ມີການແບ່ງວຽກ, ມອບຄວາມຮັບຜິດຊອບໃຫ້ກັນຢ່າງລະອຽດ, ພ້ອມນີ້ສະມາຊິກກຳມະບານແຕ່ລະສະຫາຍກໍ່ຕ້ອງມີຄວາມກະຕືລືລົ້ນ ເຂົ້າຮ່ວມຈັດຕັ້ງປະຕິບັດທິດທາງແຜນການ 5 ເປັນເຈົ້າ ປະຈຳປີ 2018 ໃຫ້ເກີດດອກອອກຜົນ ແລະ ປະສົບຜົນສຳເລັດຕາມທິດທາງແຜນການທີ່ວາງໄວ້.