JP Magazine v2 - шаблон joomla Оригами

ລັດຖະມົນຕີກະຊວງ ປທສ ພົບປະໂອ້ລົມພະນັກງານ ໄປສະນີ ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊ

ຂຽນໂດຍ khen. Posted in ກ່ຽວກັບພະແນກ

ໃນວັນທີ 12 ຕຸລາ 2017 ຜ່ານມານີ້; ທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ ພ້ອມຄະນະ ໄດ້ພົບປະໂອ້ລົມພະນັກງານຫຼັກແຫຼ່ງ ໃນຂົງເຂດໄປສະນີ, ໂທລະຄົມມະນາຄົມ ແລະ ການສື່ສານ. ເຂົ້າຮ່ວມຮັບຟັງການໂອ້ລົມຄັ້ງນີ້ມີທ່ານ ລັງສີ ແກ້ວວິເສດ ຫົວໜ້າພະແນກ ປທສ ແຂວງບໍລິຄຳໄຊ, ມີບັນດາອຳນວຍການບໍລິສັດໄປສະນີ, ໂທລະຄົມມະນາຄົມ, ພ້ອມດ້ວຍພະນັກງານ-ລັດຖະກອນພາຍໃນພະແນກ ປທສ ແຂວງ.



ໃນພິທີທ່ານ ລັງສີ ແກ້ວວິເສດ ຫົວໜ້າພະແນກ ປທສ ແຂວງ ໄດ້ລາຍງານສະພາບການຈັດຕັ້ງປະຕິບັດວຽກງານໄປສະນີ, ໂທລະຄົມມະນາຄົມ ແລະ ການສື່ສານ ພາຍໃນແຂວງ ໃນໄລຍະຜ່ານມາ ໃຫ້ທ່ານລັດຖະມົນຕີຮັບຊາບ ໂດຍທ່ານໄດ້ຍົກໃຫ້ເຫັນວ່າ: ພະແນກ ປທສ ແຂວງບໍລິຄຳໄຊ ໄດ້ເອົາໃຈໃສ່ໃນການສຶກສາອົບຮົມການເມືອງ-ແນວຄິດໃຫ້ແກ່ພະນັກງານ-ລັດຖະກອນຂອງຕົນ ໂດຍການຈັດຕັ້ງປະຕິບັດເຊື່ອມຊຶມບັນດາເອກະສານຕ່າງໆ ຕະຫຼອດພະນັກງານຢູ່ພາຍໃນບໍລິສັດ ໃຫ້ມີຄວາມອຸ່ນອຽນທຸ່ນທຽງ, ເຊື່ອໝັ້ນຕໍ່ການນຳພາຂອງພັກ, ມີຄວາມກະຕືລືລົ້ນ, ຫ້າວຫັນຕໍ່ໜ້າທີ່ວຽກງານທີ່ໄດ້ຮັບມອບໝາຍໄດ້ສຳເລັດເປັນຢ່າງດີ. ປັດຈຸບັນພະແນກ ປທສ ແລະ ບັນດາບໍລິສັດ ພາຍໃນແຂວງ ມີພະນັກງານ-ລັດຖະກອນທັງໝົດ 118 ຄົນ, ຍິງ 41 ຄົນ, ສັງກັດລັດບໍລິຫານ 19 ຄົນ, ຍິງ 7 ຄົນ ແລະ ສັງກັດລັດວິສາຫະກິດ 99 ຄົນ, ຍິງ 34 ຄົນ, ໄດ້ຊັບຊ້ອນ, ປັບປຸງພະນັກງານ-ລັດຖະກອນເຂົ້າໃສ່ບັນດາຕຳແໜ່ງງານເພື່ອໃຫ້ຖືກຕ້ອງ, ຄົບຖ້ວນຕາມພາລະບົດບາດ, ສິດ ແລະ ໜ້າທີ່ຂອງພະແນກ. ພ້ອມນັ້ນຍັງໄດ້ຕັ້ງໜ້າຊີ້ນຳ-ນຳພາໃນການຈັດຕັ້ງປະຕິບັດວຽກງານວິຊາສະເພາະ ໃນການເຄື່ອນໄຫວຕາມພາລະບົດບາດ, ໜ້າທີ່ ແລະ ຂອບເຂດສິດຂອງພະແນກ ເປັນຕົ້ນແມ່ນການຄຸ້ມຄອງມະຫາພາກ ທາງດ້ານວຽກງານ ປທສ. ໄດ້ລົງກວດກາ, ເກັບກຳບັນດາຫ້າງຮ້ານທີ່ຈຳໜ່າຍ, ສ້ອມແປງອຸປະກອນໂທລະຄົມ ແລະ ອິນເຕີເນັດ ແລະ ໄດ້ຊຸກຍູ້ໃຫ້ບັນດາບໍລິສັດ ທີ່ນຳໃຊ້ຄື້ນຄວາມຖີ່ວິທະຍຸສື່ສານ ໃຫ້ມາຂື້ນທະບຽນອອກອະນຸຍາດການນຳໃຊ້ໃຫ້ຖືກຕ້ອງຕາມກົດໝາຍ ທີ່ຂັ້ນເທິງວາງອອກ, ເອົາໃຈໃສ່ເກັບກຳຂໍ້ມູນສະຖິຕິ ວຽກງານ ປທສ ປະຈຳເດືອນ ນຳບັນດາບໍລິສັດເປັນປົກກະຕິ ແລ້ວສະຫຼຸບສັງລວມສົ່ງໃຫ້ແຂວງ ແລະ ກະຊວງ ປທສ ຕາມກຳນົດເວລາ. ປະຈຸບັນມີເສົາສົ່ງສັນຍານ 272 ເສົາ, ມີເຄື່ອງສົ່ງສັນຍານ 461 ເຄື່ອງ, ສັນຍານໂທລະສັບລະບົບ 2G ກວມ 288 ບ້ານ, ເທົ່າກັບ 98,9% ຂອງຈຳນວນບ້ານທົ່ວແຂວງ, ສັນຍານໂທລະສັບລະບົບ 3G ກວມ 180 ບ້ານ, ເທົ່າກັບ 61,85% ຂອງຈຳນວນບ້ານທົ່ວແຂວງ, ມີຜູ້ນຳໃຊ້ອິນເຕີເນັດປະຈຸບັນມີ 52,498 ລູກຄ້າ, ບັນດາບໍລິສັດຜູ້ໃຫ້ບໍລິການດ້ານໄປສະນີ, ໂທລະຄົມມະນາຄົມ ທັງໝົດເສຍພັນທະໃຫ້ແຂວງໄດ້ 16 ຕື້ກວ່າກີບ. ຈາກ​ນັ້ນ, ທ່ານ​ລັດຖະມົນຕີ​ກະຊວງ ປທສ ກໍ​ໄດ້​ໃຫ້​ກຽດ​ໂອ້​ລົມ ​ເຊິ່ງກ່ອນ​ອື່ນ ທ່ານ​ໄດ້​ກ່າວ​ສະ​ແດງ​ຄວາມ​ຍ້ອງຍໍ​ຊົມ​ເຊີຍ ຕໍ່​ຜົນງານ​ທີ່​ພະ​ແນ​ກ ປທສ ​ແລະ ບັນດາ​ບໍລິສັດ​ທີ່​ເຮັດ​ບໍລິການ​ດ້ານ​ໄປສະນີ ​ໂທລະ​ຄົມມະນາຄົມ ຍາດ​ມາ​ໄດ້, ພ້ອມ​ເນັ້ນ​ໃຫ້ ພະ​ແນ​ກ ປທສ ​ແຂວງ ເອົາ​ໃຈ​ໃສ່ເຜີຍແຜ່ນິຕິກຳການນຳໃຊ້ສື່ສັງຄົມອອນລາຍ, ການ​ຄຸ້ມ​ຄອງ​ຜູ້​ໃຫ້​ບໍລິການ ​ແລະ ຜູ້​ໃຊ້​ບໍລິການ ​ໃຫ້​ເຂົ້າ​ສູ່​ລະບຽບ​ກົດໝາຍ, ມີ​ຄວາມ​ສະດວກ ​ແລະ ມີ​ຄວາມ​ຍຸຕິ​ທຳ, ​ຜູ້​ປະກອບ​ການ​ທາງ​ດ້ານ​ໄປສະນີ, ​ໂທລະ​ຄົມມະນາຄົມ ​ໃຫ້​ເອົາ​ໃຈ​ໃສ່​ປັບປຸງ​ການ​ບໍລິການ​ໃຫ້​ໄດ້​ທັງ​ດ້ານປະລິມານ ​ແລະ ຄຸນ​ນະພາ​ບ, ຫັນ​ໄປ​ສູ່​ການ​ບໍລິການ​ແບບ​ໃໝ່ ທີ່​ທັນ​ສະ​ໄໝ ​ແນ​ໃສ່​ເຮັດ​ໃຫ້ການ​ຄຸ້ມ​ຄອງ​ບໍລິຫານ​ລັດ​ກ່ຽວກັບ​ຂະ​ແໜງ ​ໄປສະນີ ​ໂທລະ​ຄົມມະນາຄົມ ​ແລະ ການ​ສື່ສານ ​ຂັ້ນ​ທ້ອງ​ຖິ່ນ​ໃຫ້​ນັບ​ມື້​ນັບ​ດີ​ຂຶ້ນ​ເທື່ອ​ລະ​ກ້າວ.