JP Magazine v2 - шаблон joomla Оригами

ຮາກຖານພັກ ພະແນກ ປທສ ແຂວງບໍລິຄຳໄຊ ເປີດບັ້ນດຳເນີນຊີວິດການເມືອງ ກວດກາໜ່ວຍພັກເຂັ້ມແຂງ-ຮູ້ນຳພາຮອບດ້ານ ປະຈຳປີ 2017

ຂຽນໂດຍ khen. Posted in ກ່ຽວກັບພະແນກ

 

ໃນລະຫວ່າງວັນທີ 22-24 ສິງຫາ 2017 ຜ່ານມານີ້, ຢູ່ທີ່ຫ້ອງປະຊຸມຂອງລັດວິສາຫະກິດ ລາວໂທລະຄົມ ສາຂາແຂວງບໍລິຄຳໄຊ ໄດ້ເປີດບັ້ນດຳເນີນຊີວິດການເມືອງກວດກາໜ່ວຍພັກເຂັ້ມແຂງ-ຮູ້ນຳພາຮອບດ້ານ ທົ່ວຮາກຖານພັກພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງ ບໍລິຄຳໄຊ. ພາຍໃຕ້ການເປັນປະທານຂອງທ່ານ ລຳສະໄໝ ວໍລະສານ ຄະນະປະຈຳພັກແຂວງ ປະທານແນວລາວສ້າງຊາດ ແຂວງບໍລິຄຳໄຊ, ມີຄະນະພັກ, ສະມາຊິກພັກສົມບູນ ແລະ ສຳຮອງພາຍໃນ 4 ໜ່ວຍພັກຂື້ນກັບເຂົ້າຮ່ວມຢ່າງພ້ອມພຽງ.

ເອກະສານທີ່ນຳມາເຜີຍແຜ່ໃນຄັ້ງນີ້ປະກອບມີ 3 ເອກະສານຄື: ເອກະສານຄຸນສົມບັດສິນທຳປະຕິວັດຂອງພະນັກງານ, ສະມາຊິກພັກໃນພາລະກິດປ່ຽນແປງໃໝ່, ຂໍ້ກຳນົດເລກທີ 02/ກມສພ ວ່າດ້ວຍລະບອບການກວດກາຕີລາຄາແບ່ງປະເພດຄຸນນະພາບການຈັດຕັ້ງຮາກຖານພັກ ແລະ ສະມາຊິກພັກ, ຂໍ້ກຳນົດເລກທີ 01/ກມສພ ວ່າດ້ວຍການຕີລາຄາແບ່ງປະເພດພະນັກງານ. ໃຫ້ກຽດເຜີຍແຜ່ເອກະສານໃນຄັ້ງນີ້ໂດຍທ່ານ ລຳສະໄໝ ວໍລະສານ ຄະນະປະຈຳພັກແຂວງ ປະທານແນວລາວສ້າງຊາດແຂວງ ແລະ ທ່ານລັງສີ ແກ້ວວິເສດ ເລຂາຄະນະພັກຮາກຖານຫົວໜ້າພະແນກ ປທສ ແຂວງ. ຜ່ານການຄົ້ນຄ້ວາເຊື່ອມຊຶມບັນດາເອກະສານເຫຼົ່ານີ້ແລ້ວ, ສະມາຊິກພັກແຕ່ລະສະຫາຍກໍ່ໄດ້ຂຽນໃບສຳຫຼວດຕົນເອງ ພ້ອມແບ່ງໜ່ວຍຜ່ານໃບສຳຫຼວດ ເພື່ອສະຫຼຸບການກວດກາການຊີ້ນຳ-ນຳພາ ແລະ ການຈັດຕັ້ງປະຕິບັດໜ້າທີ່ວຽກງານຂອງຕົນຮັບຜິດຊອບໃນໄລຍະ 1 ປີຜ່ານມາ, ເຊິ່ງຍົກໃຫ້ເຫັນດ້ານດີ, ດ້ານອ່ອນ, ການແກ້ໄຂຂໍ້ຄົງຄ້າງ ແລະ ການໃຫ້ຄຳຄິດຄຳເຫັນຕຳນິສົ່ງຂ່າວໃນການກໍ່ສ້າງ ແລະ ຊຸກຍູ້ຊ່ວຍເຫຼືອເຊິ່ງກັນ ແລະ ກັນ. ເພື່ອຕີລາຄາຈັດແບ່ງປະເພດຂອງໜ່ວຍພັກ ແລະ ສະມາຊິກພັກ ຕາມເນື້ອໃນ 4 ເຂັ້ມແຂງ 5 ຮູ້ນຳພາ ທີ່ທາງຄະນະພັກຂັ້ນເທິງວາງອອກ.