JP Magazine v2 - шаблон joomla Оригами

ສະພາປະຊາຊົນ ແຂວງບໍລິຄຳໄຊ ໄດ້ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງພະແນກ ປທສ ແຂວງບໍລິຄຳໄຊ

ຂຽນໂດຍ khen. Posted in ກ່ຽວກັບພະແນກ

ວັນທີ 16 ສິງຫາ 2017 ຜ່ານມານີ້; ຢູ່ທີ່ຫ້ອງປະຊຸມ ບໍລິສັດ ລາວໂທລະຄົມ ສາຂາແຂວງບໍລິຄຳໄຊ ສະມາຊິກສະພາປະຊາຊົນ ແຂວງບໍລິຄຳໄຊ ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊ, ພາຍໃຕ້ການເປັນປະທານຂອງ ທ່ານ ນວນສະຫວັນ ແສງມະນີ ຮອງປະທານສະພາປະຊາຊົນ ແຂວງບໍລິຄຳໄຊ, ເຂົ້າຮ່ວມໃນຄັ້ງນີ້ມີ ທ່ານ ລັງສີ ແກ້ວວິເສດ ເລຂາຄະນະພັກຮາກຖານ ຫົວໜ້າພະແນກ ປທສ ແຂວງ, ມີບັນດາອຳນວຍການບໍລິສັດລັດວິສາຫະກິດໄປສະນີ, ໂທລະຄົມມະນາຄົມ ພ້ອມດ້ວຍພະນັກງານລັດຖະກອນ ພະແນກ ປທສ ແລະ ຜູ້ໃຫ້ບໍລິການດ້ານໄປສະນີ, ໂທລະຄົມມະນາຄົມ ພາຍໃນແຂວງເຂົ້າຮ່ວມ.

ໃນພິທີທ່ານ ໃສຄຳ ທອງລັດ ປະທານຄະນະກຳມະການ ເສດຖະກິດ ແຜນການ ແລະ ການເງິນ ໄດ້ຂື້ນຜ່ານມະຕິເຊັນ: ມະຕິ ຂອງຄະນະປະຈຳສະພາປະຊາຊົນແຂວງບໍລິຄຳໄຊ ວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານຂອງຄະນະກຳມະການເສດຖະກິດ ແຜນການ ແລະ ການເງິນ; ມະຕິ ກອງປະຊຸມຄັ້ງປະຖົມມະລຶກຂອງສະພາປະຊາຊົນ ແຂວງບໍລິຄຳໄຊ ຊຸດທີ I; ມະຕິ ກອງປະຊຸມສະພາປະຊາຊົນ ແຂວງບໍລິຄຳໄຊ ວ່າດ້ວຍການຮັບຮອງເອົາການຈັດຕັ້ງປະຕິບັດແຜນງົບປະມານແຫ່ງລັດສົກປີ 2015-2016, ງົບປະມານ 3 ເດືອນຂ້າມຜ່ານ ແລະ ແຜນງົບປະມານ ປີ 2017; ມະຕິ ກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ສົກປີ 2015-2016 ແລະ ທິດທາງແຜນການປີ 2017; ມະຕິ ກອງປະຊຸມສະພາປະຊາຊົນແຂວງບໍລິຄຳໄຊ ວ່າດ້ວຍການຮັບຮອງເອົາບົດລາຍງານຂອງອົງການກວດສອບປະຈຳພາກກາງ ກ່ຽວກັບຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານຂອງແຂວງບໍລິຄຳໄຊ ສົກປີ 2014-2015, ການຈັດຕັ້ງປະຕິບັດຄໍາແນະນໍາກວດສອບປີຜ່ານມາ ແລະ ບົດລາຍງານຂອງພະແນກກວດກາລັດແຂວງ ສົກປີ 2015-2016 ແລະ ທິດທາງແຜນການເຄື່ອນໄຫວ ປະຈຳປີ 2017; ມະຕິ ກອງປະຊຸມຄະນະປະຈຳສະພາແຫ່ງຊາດ ວ່າດ້ວຍການຮັບຮອງເອົານະໂຍບາຍ ຕໍ່ສະມາຊິກສະພາແຫ່ງຊາດ ຊຸດທີ VII ແລະ ສະມາຊິກສະພາປະຊາຊົນແຂວງ, ນະຄອນຫຼວງ ແລະ ມະຕິ ກອງປະຊຸມຄັ້ງປະຖົມມະລຶກຂອງສະພາປະຊາຊົນ ແຂວງບໍລິຄຳໄຊ ຊຸດທີ I ວ່າດ້ວຍການຮັບຮອງເອົາໂຄງປະກອບການຈັດຕັ້ງ ແລະ ບຸກຄະລາກອນຂອງສະພາປະຊາຊົນ ແຂວງບໍລິຄຳໄຊ. ພ້ອມເນັ້ນໃຫ້ພະແນກ ປທສ ແຂວງ ເອົາໃຈໃສ່ໃນການຄຸ້ມຄອງມະຫາພາກ ແລະ ລົງເຜີຍແຜ່ການນຳໃຊ້ສື່ສັງຄົມອອນລາຍ ໃຫ້ແກ່ນັກຮຽນ, ສັກສຶກສາ ເພື່ອໃຫ້ເຂົາເຈົ້າຮູ້ຈັກນຳໃຊ້ ໃຫ້ຖືກຕ້ອງຕາມລະບຽບກົດໝາຍທີ່ຂັ້ນເທິງວາງອອກ.