JP Magazine v2 - шаблон joomla Оригами

ສຳເລັດບັ້ນດຳເນີນຊີວິດການເມືອງປັບປຸງປົວແປງພາຍໃນຮາກຖານພັກພະແນກ ປທສ ແຂວງ ປະຈຳ ປີ 2017.

ຂຽນໂດຍ Super User. Posted in ກ່ຽວກັບພະແນກ

 

ໃນລະຫວ່າງ ວັນທີ 20-26 ກໍລະກົດ 2017 ຜ່ານມານີ້,ຄະນະພັກຮາກຖານ ພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງ, ໄດ້ເປີດກອງປະຊຸມບັ້ນດຳເນີນຊີວິດການເມືອງປັບປຸງປົວແປງພາຍໃນພັກຂື້ນຢູ່ທີ່ຫ້ອງປະຊຸມລັດວິສະຫະກິດລາວໂທລະຄົມສາຂາແຂວງ ບໍລິຄຳໄຊ ພາຍໃຕ້ການເປັນປະທານ ຂອງ ສະຫາຍ ລັງສີ ແກ້ວວິເສດ ເລຂາຄະນະພັກຮາກຖານ,ຫົວໜ້າ ພະແນກ ປທສ ແຂວງ ບໍລິຄຳໄຊ ໂດຍໃຫ້ກຽດເຂົ້າຮ່ວມຂອງ ທ່ານ ປອ ສຸວັນນີ ໄຊຊະນະ ຮອງເລຂາພັກ ແຂວງ ປະທານສະພາປະຊາຊົນແຂວງ, ມີຄະນະພັກຮາກຖາກ, ຄະນະໜ່ວຍພັກ ພ້ອມດ້ວຍສະມາຊິກພັກສົມບູນ ແລະ ສຳຮອງພາຍໃນ 4 ໜ່ວຍພັກຂື້ນກັບເຂົ້າຮ່ວມທັງໝົດ 56 ສະຫາຍ, ຍິງ 14 ສະຫາຍ.

         ສະຫາຍ ລັງສີ ແກ້ວວິເສດ ເລຂາຄະນະພັກຮາກຖານ,ຫົວໜ້າ ພະແນກ ປທສ ແຂວງ ໄດ້ຜ່ານບົດສະຫຼຸບການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງແຂວງ ແລະ ມະຕິກອງປະຊຸມໃຫຍ່ຄັ້ງທີ I ຂອງຄະນະພັກຮາກຖານພະແນກ ປທສ ແຂວງ ພ້ອມຜ່ານ ທິດທາງແຜນການໃນຕໍ່ໜ້າໂດຍໄດ້ຍົກໃຫ້ເຫັນຜົນງານການຊີ້ນຳ-ນຳພາຂອງຄະນະພັກຮາກຖານຄະນະໜ່ວຍພັກ ໃນແຕ່ລະດ້ານ. ຍົກໃຫ້ເຫັນດ້ານອ່ອນ, ຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້, ພ້ອມທັງໄດ້ວາງທິດທາງລວມ ແລະ ຄາດໝາຍສູ້ຊົນໃນຊຸມປີຕໍ່ໜ້າ ແລະ ບາງວຽກງານຈຸດສຸມໃນປີ 2017.

        ຜູ້​ເຂົ້າ​ຮ່ວມ​ກອງ​ປະ​ຊຸມໄດ້​ຜ່ານ​ບົດ​ສຳຫຼວດຕົວ​ເອງ ​ແລະ ​ໄດ້​ໃຊ້ສິດ​ປະຊາທິປະ​ໄຕ​ເຂົ້າ​ໃນ​ການ​ປະກອບ​ຄຳ​ເຫັນ​ສົ່ງ​ຂ່າວ​ຕໍ່​ຄວາມ​ຮັບຜິດຊອບ​ລວມ ​ແລະ ຕໍ່ບຸກຄົນ​ໃນ​ຄະນະ​ພັກ​ຮາກ​ຖາກ, ຄະນະໜ່ວຍພັກ, ຄະນະ​ພະ​ແນ​ກ, ຄະນະ​ອຳນວຍ​ການ, ຫົວໜ້າ, ຮອງ​ຫົວໜ້າ​ຂະ​ແໜງ, ຫົວໜ້າ, ຮອງ​ຫົວໜ້າ​ພາກ​ສ່ວນ ​ແລະ ສູນ, ດຳ​ເນີນ​ການ​ສຳຫຼວດກວດກາ, ຕຳ​ນິຕິ​ຊົມ​ຕົນ​ເອງ ​ແລະ ໝູ່​ຄະນະ, ດຳ​ເນີນ​ການ​ລົງ​ຄະ​ແນນ​ສ້ຽງຄວາມ​ເຊື້ອ​ໝັ້ນ​ໄວ້​ວາງ​ໃຈ​ຕໍ່ຄະນະ​ພັກ, ຄະນະ​ພະ​ແນນ, ຄະນະ​ອຳນວຍ​ການ​ຈຳນວນ 11 ສະຫາຍ, ຍິງ 1 ສະຫາຍ ​ເຊິ່ງມີຜູ້​ເຂົ້າ​ຮ່ວມ​ລົງ​ຄະ​ແນນ​ສ້ຽງທັງ​ໝົດ 56 ສະຫາຍ, ຄະ​ແນນ​ສ້ຽງ​ເຫັນດີ ​ເທົ່າ​ກັບ 94,32 % ​ແລະ ບໍ່​ເຫັນ​ດີ​ເທົ່າ​ກັບ 5,68 %.

        ​ໃນ​ໂອກາດ​ດັ່ງກ່າວ​ນີ້, ສະຫາຍ ປອ ສຸວັນ​ນີ ​ໄຊຊະນະ ຮອງ​ເລຂາ​ພັກ ​ແຂວງ ປະທານ​ສະພາ​ປະຊາຊົນ ​ແຂວງ ​ໄດ້​ໃຫ້ກຽດ​ໂອ້​ລົມ​ເຊິ່ງກ່ອນ​ອື່ນ​ທ່ານ​ໄດ້​ກ່າວ​ສະ​ແດງ​ຄວາມ​ຍ້ອງຍໍຊົມ​ເຊີຍ​ຕໍ່ຜົນງານທີ່​ຄະນະ​ພັກ, ສະມາຊິກ​ພັກ​ຍາດ​ມາ​ໄດ້​ໃນ​ໄລຍະ​ຜ່ານ​ມາ, ພ້ອມ​ເນັ້ນ​ໃຫ້​ເອົາ​ໃຈ​ໃສ່​ແກ້​ໄຂ​ຈຸດ​ອ່ອນ, ຂໍ້ຄົງຄ້າງ, ຍົກ​ໃຫ້​ເຫັນ​ຄວາມ​ໝາຍ, ​ຄວາມສຳຄັນ​ຂອງ​ບັ້ນ​ດຳ​ເນີນ​ຊີວິດ​ການ​ເມືອງ​ປັບປຸງ​ປົວ​ແປງ​ພັກ​ໃນ​ຄັ້ງ​ນີ້, ຄະນະພັກ, ສະມາຊິກພັກຕ້ອງເອົາໃຈໃສໃນການຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທຳປະຕິບັດ, ເປັນແບບຢ່າງຕໍ່ໜ້າໃນທຸກຂະບວນການວຽກງານ, ຕ້ານພະຍາດອາດຍາສິດ, ເອກະຊົນ, ເຫັນແກ່ຜົນປະໂຫຍດສ່ວນຕົວ ແລະ ຍາດຕິພີ່ນ້ອງ, ຈຸ່ມເຈື່ອຂອງຕົນ, ມີສະຕິເຄົາລົບ ແລະ ປະຕິບັດລະບຽບກົດໝາຍ, ເຂັ້ມງວດຕໍ່ການປະຕິບັດຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ມີການແບ່ງງານໃຫ້ກັນຢ່າງຈະແຈ່ງ, ຖືເອົາການຕຳນິຕິຊົມຕົນເອງ ແລະ ຕິຊົມເຊິ່ງກັນ ແລະ ກັນເປັນຫຼັກການໃນການກໍ່ສ້າງ ແລະ ປັບປຸງການຈັດຕັ້ງຮາກຖາກພັກ, ສະມາຊິກພັກໃຫ້ມີຄວາມປອດໃສ, ໜັກແໜ້ນ ແລະ ເຂັ້ມແຂງ.