JP Magazine v2 - шаблон joomla Оригами

ໜ້າຫຼັກ

ກໍາມະບານຮາກຖານພະແນກ ປທສ ແຂວງບໍລິຄຳໄຊ ປະເມີນຜົນຂະບວນການ 5 ເປັນເຈົ້າ ປະຈຳປີ 2018

ຂຽນໂດຍ khen. Posted in ໜ້າຫຼັກ

  

ບັ້ນດຳເນີນການກວດກາ ປະເມີນຜົນຂະບວນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຂອງກຳມະບານຮາກຖານພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊ ໄດ້ຈັດຂື້ນໃນລະຫວ່າງ ວັນທີ 20-21 ສິງຫາ 2018 ຜ່ານມານີ້, ທີ່ຫ້ອງປະຊຸມພະແນກ ໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊ, ພາຍໃຕ້ການເປັນປະທານຂອງທ່ານ ສັກປະເສີດ ໄຊຊະນະສີ ປະທານກຳມະບານຮາກຖານພະແນກ ປທສ ແຂວງ, ໂດຍການເປັນກຽດເຂົ້າຮ່ວມຂອງ ທ່ານ ວັດທະນາ ສີສຸວັນທອງ ຄະນະບໍລິຫານງານສະຫະພັນກຳມະບານແຂວງ ປະທານສະຫະພັນກຳມະບານພະແນກ ປທສ ແຂວງ, ທ່ານ ວັດທະນາ ໄຊຍະແສງ ເລຂາໜ່ວຍພັກພະແນກ ປທສ ແຂວງ, ພ້ອມດ້ວຍສະມາຊິກກຳມະບານພາຍໃນຮາກຖານຂອງຕົນເຂົ້າຮ່ວມຢ່າງພ້ອມພຽງ.

ໃນວາລະການດຳເນີນ ປະເມີນຜົນຂະບວນການ 5 ເປັນເຈົ້າຄັ້ງນີ້, ທ່ານ ສັກປະເສີດ ໄຊຊະນະສີ ໄດ້ເຜີຍແຜ່ເນື້ອໃນຂໍ້ແຂ່ງຂັນ 5 ເປັນເຈົ້າຄື: 1). ເປັນເຈົ້າໂຄສະນາສຶກສາອົບຮົມການເມືອງ-ແນວຄິດ, 2). ເປັນເຈົ້າໃນການປັງປຸງແບບແຜນການນຳພາ ແລະ ຂະຫາຍການຈັດຕັ້ງກຳມະບານ, 3). ເປັນເຈົ້າການປົກປ້ອງສິດ ແລະ ຜົນປະໂຫຍດອັນຊອບທຳ ຂອງພະນັກງານສະມາຊິກກຳມະບານ, ກຳມະກອນ ແລະ ຜູ້ອອກແຮງງານ, 4). ເປັນເຈົ້າເຂົ້າຮ່ວມໃນການຕິດຕາມ, ກວດກາການຄຸ້ມຄອງລັດ, ຄຸ້ມຄອງເສດຖະກິດ, ວັດທະນະທຳ-ສັງຄົມ ແລະ 5). ເປັນເຈົ້າເຂົ້າຮ່ວມການຈັດຕັ້ງປະຕິບັດແນວທາງການຕ່າງປະເທດຂອງພັກ, ລະບຽບກົດໝາຍຂອງລັດ. ຜ່ານການຄົ້ນຄວ້າເຊື່ອມຊຶມເອກະສານເຫຼົ່ານີ້ແລ້ວ, ພາຍໃນກອງປະຊຸມຍັງໄດ້ດຳເນີນການຜ່ານໃບປະເມີນຜົນ ເພື່ອຕີລາຄາທາງ​ດ້ານ​ດີ, ດ້ານ​ອ່ອນ ​ແລະ ອອກ​ຄຳ​ຄິດ​ຄຳ​ເຫັນຕຳ​ນິສົ່ງ​ຂ່າວ ເພື່ອ​ກໍ່ສ້າງ ​ແລະ ຊ່ວຍ​ເຫຼືອ​ເຊິ່ງກັນ ​ແລະ ກັນ, ​ໄດ້ຈັດ​ແບ່ງ​ປະ​ເພດໃຫ້ແຕ່ລະສະຫາຍ.

 

ຈາກນັ້ນທ່ານ ນາງ ພິມພອນ ໄຊຍະລາດ ຮອງປະທານກຳມະບານຮາກຖານພະແນກ ປທສ ແຂວງ, ກໍໄດ້ຜ່ານບົດສະຫຼຸບລາຍງານຜົນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈຳປີ 2018 ແລະ ວາງທິດທາງແຜນການ 2019: ເຊິ່ງໃນໜຶ່ງປີຜ່ານມາສະມາຊິກກຳມະບານແຕ່ລະສະຫາຍ ຍັງສາມາດຮັກສາໄດ້ທັດສະນະຫຼັກໝັ້ນໃນອຸດົມການຂອງພັກ, ມີຄວາມຈົງຮັກພັກດີຕໍ່ພັກ, ຕໍ່ອຸດົມການສັງຄົມນິຍົມ, ຊື່ສັດບໍລິສຸດຕໍ່ພັກ-ຕໍ່ລັດ, ຕໍ່ປະເທດຊາດ ແລະ ປະຊາຊົນກໍ່ຄືຊາວຜູ້ອອກແຮງງານລາວບັນດາເຜົ່າ, ພ້ອມນັ້ນຍັງໄດ້ປະຕິບັດພາລະບົດບາດ, ໜ້າທີ່ ແລະ ສິດຂອງຕົນ, ອອກແຮງແຂ່ງຂັນປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ທີ່ທາງສູນກາງສະຫະພັນກຳມະບານລາວວາງອອກ. ກຳມະບານຮາກຖານພະແນກ ປທສ ແຂວງ ມີສະມາຊິກກຳມະບານທັງໝົດ 22 ສະຫາຍ, ຍິງ 10 ສະຫາຍ, ກວມເອົາ 99% ຂອງຈໍານວນພະນັກງານທັງໝົດ, ເຊິ່ງໄດ້ກາຍເປັນເງື່ອນໄຂ ແລະ ກຳລັງແຮງໃຫ້ແກ່ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ. ຜ່ານການກວດກາປະເມີນຜົນຂະບວນການ 5 ເປັນເຈົ້າ ສາມາດສັງລວມໄດ້ເປັນກຳມະບານຮາກຖານ 5 ເປັນເຈົ້າ ປະຈຳປີ 2018 ແລະ ບຸກຄົນຜູ້ທີ່ມີຜົນງານດີເດັ່ນປະເພດ 1 ມີ 17 ສະຫາຍ, ຍິງ 6 ສະຫາຍ, ປະເພດ 2 ມີ 5 ສະຫາຍ, ຍິງ 4 ສະຫາຍ.

ໃນພິທີຍັງໄດ້ມອບໃບຍ້ອງຍໍ ແລະ ໃບຊົມເຊີຍໃຫ້ແກ່ສະມາຊິກກຳມະບານຜູ້ທີ່ມີຜົນງານດີເດັ່ນໃນການເຄື່ອນໄຫວປະຕິບັດວຽກງານກຳມະບານໃນໄລຍະ 1 ປີຜ່ານມາ ເຊີ່ງມີຜູ້ໄດ້ຮັບໃບຍ້ອງຍໍ ຈຳວນ 7 ສະຫາຍ ແລະ ຮັບໃບຊົມເຊີຍ ຈຳນວນ 9 ສະຫາຍ, ຍິງ 5 ສະຫາຍ.

ໃນໂອກາດສະຫຼຸບບັ້ນປະເມີນຜົນ 5 ເປັນເຈົ້າຄັ້ງນີ້ ທ່ານ ວັດທະນາ ສີສຸວັນທອງ ຄະນະບໍລິຫານງານສະຫະພັນກຳມະບານແຂວງ ປະທານສະຫະພັນກຳມະບານພະແນກ ປທສ ແຂວງ ກໍ່ໄດ້ໃຫ້ກຽດໂອ້ລົມສະມາຊິກກຳມະບານ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໝາກຜົນໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ໃນໄລຍະ 1 ປີ ຜ່ານມາ. ພ້ອມເນັ້ນໃຫ້ສືບຕໍຊີ້ນຳ-ນຳພາສຶກສາອົບຮົມການເມືອງ-ແນວຄິດ ຂອງພະນັກງານ, ສະມາຊິກກຳມະບານ ໂດຍສະເພາະແມ່ນ ການນຳເອົາລະບຽບ, ກົດໝາຍ, ນິຕິກຳຕ່າງໆ ມາຈັດຕັ້ງເຊື່ອມຊຶມໃຫ້ເປັນປົກກະຕິ ແລະ ຕໍ່ເນື່ອງ, ເພີ່ມທະວີຄວາມສາມັກຄີເປັນເອກະພາບພາຍໃນໃຫ້ແໜ້ນແຟ້ນ, ຢຶດໝັ້ນຫຼັກການລວມສູນປະຊາທິປະໄຕ, ບຸກຄົນຮັບຜິດຊອບ, ມີການແບ່ງວຽກ, ມອບໝາຍວຽກງານໃຫ້ກັນຢ່າງລະອຽດ, ພ້ອມນີ້ສະມາຊິກກຳມະບານແຕ່ລະສະຫາຍກໍ່ຕ້ອງມີຄວາມກະຕືລືລົ້ນ ເຂົ້າຮ່ວມຈັດຕັ້ງປະຕິບັດທິດທາງແຜນການ 5 ເປັນເຈົ້າ ປະຈຳປີ 2019 ໃຫ້ເກີດດອກອອກຜົນ ແລະ ປະສົບຜົນສຳເລັດຕາມທິດທາງແຜນການທີ່ວາງໄວ້.